हिमायतनगर | देवानंद गुंडेकर सरसमकर
हिमायतनगर येथील सार्वजनिक बांधकाम विभागाच्या उपविभागीय कार्यालयातील कारभारावर नागरिक व ठेकेदारांकडून नाराजी व्यक्त केली जात आहे. कार्यालयीन वेळेत संबंधित अधिकारी व कर्मचारी उपस्थित राहत नसल्याने विविध कामांसाठी येणाऱ्या नागरिकांची गैरसोय होत असल्याची तक्रार पुढे येत आहे.
स्थानिक नागरिकांच्या म्हणण्यानुसार, उपविभागीय अभियंत्यासह अनेक अधिकारी व कर्मचारी कार्यालयीन वेळेत अनुपस्थित राहत असल्याने विभागाशी संबंधित कामे रखडत आहेत. विविध प्रशासकीय कामांसाठी कार्यालयात येणाऱ्या नागरिकांना वारंवार हेलपाटे मारावे लागत असल्याचे सांगितले जात आहे.
याशिवाय, काही रस्ते व इतर विकासकामे निकृष्ट दर्जाची होत असल्याचा आरोपही करण्यात येत आहे. ठेकेदार आणि संबंधित अधिकाऱ्यांमध्ये संगनमत असल्यामुळे कामांच्या गुणवत्तेकडे दुर्लक्ष केले जात असल्याची चर्चा परिसरात सुरू आहे. निकृष्ट दर्जाच्या कामांबाबत तक्रारी करण्यात आल्यास त्यांची दखल घेतली जात नसल्याचा आरोप तक्रारदारांनी केला आहे.
सार्वजनिक निधीतून होणाऱ्या विकासकामांची गुणवत्ता टिकवून ठेवणे आणि नागरिकांना वेळेत सेवा उपलब्ध करून देणे ही विभागाची जबाबदारी आहे. त्यामुळे या प्रकरणाची वरिष्ठ अधिकाऱ्यांनी चौकशी करून कार्यालयीन शिस्त राखावी तसेच निकृष्ट कामांवर कठोर कारवाई करावी, अशी मागणी नागरिकांकडून होत आहे.