हिमायतनगर प्रतिनिधी :
दिव्यांग कल्याण विभाग, महाराष्ट्र शासन यांच्या सूचनेनुसार राज्यातील सर्व दिव्यांग नागरिकांची माहिती अद्ययावत ठेवण्यासाठी तसेच विविध शासकीय योजनांचा लाभ पारदर्शक पद्धतीने देण्यासाठी UDID Card (Unique Disability ID Card) व E-Disability Certificate अनिवार्य करण्यात आले आहे.
राज्य शासनामार्फत दिव्यांग व्यक्तींसाठी राबविण्यात येणाऱ्या विविध योजनांचा लाभ घेण्यासाठी UDID कार्ड असणे आवश्यक असल्याचे प्रशासनाकडून स्पष्ट करण्यात आले आहे. विशेषतः संजय गांधी निराधार योजना व श्रावणबाळ सेवा राज्य निवृत्तीवेतन योजना यांसारख्या योजनांचा लाभ घेणाऱ्या दिव्यांग लाभार्थ्यांनी आपली UDID कार्डची माहिती शासनाकडे नोंदविणे आवश्यक आहे.
या पार्श्वभूमीवर नांदेड जिल्ह्यातील हिमायतनगर तालुक्यातील सर्व दिव्यांग नागरिकांनी आपले UDID कार्ड व आधार कार्ड यांची प्रत तहसील कार्यालय, हिमायतनगर येथे सादर करावी, असे आवाहन करण्यात आले आहे.
तहसीलदार पल्लवी टेमकर यांनी सांगितले की, तालुक्यातील सर्व दिव्यांग नागरिकांनी आपले UDID कार्ड व आधार कार्ड संबंधीत कागदपत्रांसह दिनांक 31 मार्च 2026 पर्यंत तहसील कार्यालय, हिमायतनगर येथे जमा करून प्रशासनास सहकार्य करावे, जेणेकरून शासनाच्या विविध योजनांचा लाभ योग्य व पारदर्शक पद्धतीने मिळू शकेल.