हिमायतनगर : देवानंद गुंडेकर सरसमकर
हिमायतनगर तहसील कार्यालयाच्या कर्तव्यदक्ष तहसीलदार पल्लवी टेमकर यांना आदर्श पुरस्कार देऊन सन्मानित करण्यात आले.महसूल विभागाच्या माध्यमातून नागरिकांना प्रभावी, पारदर्शक आणि गतिमान सेवा देत कर्तव्यनिष्ठपणे प्रशासनाची धुरा सांभाळणाऱ्या हिमायतनगर तहसील कार्यालयाच्या तहसीलदार पल्लवी टेमकर यांच्या उल्लेखनीय कार्याची जिल्हा प्रशासनाने दखल घेतली आहे. दि. ६ ऑगस्ट रोजी महसूल दिनानिमित्त आयोजित कार्यक्रमात तहसीलदार पल्लवी टेमकर यांना ‘जिल्हा आदर्श तहसीलदार पुरस्कार’ देऊन गौरविण्यात आले. जिल्हाधिकारी राहुल कर्डिले यांच्या हस्ते हा पुरस्कार प्रदान करण्यात आला.
महसूल दिनाच्या निमित्ताने महसूल विभागात उत्कृष्ट कार्य करणाऱ्या अधिकारी व कर्मचाऱ्यांचा गौरव करण्यात आला. यामध्ये हिमायतनगरच्या तहसीलदार पल्लवी टेमकर यांची कर्तव्यनिष्ठा, प्रशासकीय कार्यक्षमता आणि नागरिकाभिमुख कामकाजाची विशेष दखल घेण्यात आली.
तहसीलदार पल्लवी टेमकर यांनी हिमायतनगर तालुक्यातील महसूल प्रशासन अधिक प्रभावीपणे राबविण्यासाठी सातत्याने प्रयत्न केले आहेत. सर्वसामान्य नागरिक, शेतकरी तसेच विविध घटकांशी संबंधित महसूलविषयक कामांना प्राधान्य देत प्रकरणांचा वेळेत निपटारा करण्यावर त्यांनी भर दिला आहे. नागरिकांच्या अडचणी जाणून घेऊन त्यांचे प्रश्न प्रशासकीय पातळीवर मार्गी लावण्यासाठी त्यांनी विशेष प्रयत्न केले.
महसूल विभागाशी संबंधित दाखले, फेरफार, जमीनविषयक प्रकरणे, शेतकऱ्यांच्या समस्या, नैसर्गिक आपत्तीच्या काळातील मदतकार्य तसेच शासनाच्या विविध योजना आणि उपक्रमांची अंमलबजावणी करताना प्रशासन अधिक लोकाभिमुख राहावे, यासाठी तहसीलदार पल्लवी टेमकर यांनी अधिकारी व कर्मचाऱ्यांना मार्गदर्शन केले.
तालुक्यातील महसूल यंत्रणा अधिक सक्षम ठेवण्यासाठी मंडळ अधिकारी, तलाठी आणि इतर महसूल कर्मचाऱ्यांच्या कामकाजाचा आढावा घेत आवश्यक त्या सूचना देत कामात पारदर्शकता व गतिमानता आणण्याचा प्रयत्न करण्यात आला. त्यामुळे महसूल प्रशासनाच्या कामकाजाला अधिक शिस्तबद्ध स्वरूप प्राप्त झाले आहे.
विशेषतः शेतकरी आणि सर्वसामान्य नागरिकांना महसूल कार्यालयातील कामांसाठी अनावश्यक विलंब होऊ नये, त्यांच्या तक्रारी व अडचणींचे योग्य पद्धतीने निराकरण व्हावे, यासाठी प्रशासनाकडून सातत्याने प्रयत्न करण्यात आले. या कार्यपद्धतीची दखल घेत जिल्हा प्रशासनाने पल्लवी टेमकर यांना जिल्हा आदर्श तहसीलदार पुरस्कार प्रदान केला.
जिल्हाधिकारी राहुल कर्डिले यांच्या हस्ते पुरस्कार स्वीकारताना तहसीलदार पल्लवी टेमकर यांनी हा सन्मान केवळ वैयक्तिक नसून हिमायतनगर तहसील कार्यालयातील संपूर्ण महसूल यंत्रणेच्या सामूहिक कार्याचा गौरव असल्याची भावना व्यक्त केली. अधिकारी व कर्मचाऱ्यांच्या सहकार्यामुळेच नागरिकांना चांगल्या पद्धतीने सेवा देणे शक्य होत असल्याचे त्यांनी नमूद केले.
दरम्यान, महसूल दिनानिमित्त मिळालेल्या या सन्मानामुळे हिमायतनगर तालुक्यातील महसूल विभागातील अधिकारी व कर्मचाऱ्यांमध्ये उत्साहाचे वातावरण निर्माण झाले आहे. तहसीलदार पल्लवी टेमकर यांचे विविध स्तरातून अभिनंदन होत असून, त्यांच्या पुढील प्रशासकीय कार्यासाठी शुभेच्छा व्यक्त केल्या जात आहेत.
हिमायतनगरच्या महसूल प्रशासनातील कर्तव्यनिष्ठ व लोकाभिमुख कार्याची जिल्हास्तरावर झालेली दखल हा तालुक्यासाठी निश्चितच अभिमानाचा क्षण ठरला आहे.